Տոնեցքի եւ Լուկանսքի ղեկավարներու ԵԱՀԿ-ին ուղղուած կոչը` ապահովելու զինադադարի վերահսկողութիւնը։
Տոնեցքի եւ Լուկանսքի ժողովրդական հանրապետութիւնները դիմած են ԵԱՀԿ-ին` կոչ ուղղելով
ապահովելու Ուքրանիոյ հարաւարեւելքին մէջ զինադադարի պահպանման վերահսկողութիւնը: Տոնեցքի
ժողովրդական հանրապետութեան վարչապետ Ալեքսանտր Զախարչենքոյի եւ Լուկանսքի ժողովրդական
հանրապետութեան ղեկավար Իկոր Փլոթնիցքիի ստորագրած փաստաթուղթին մէջ կ՛ըսուի. «Յոյս ունինք,
որ ԵԱՀԿ-ը պիտի ապահովէ զինադադարի դրութեան պահպանման միջազգային անկողմնակալ վերահսկողութիւնը,
ինչպէս նաեւ Ուքրանիոյ իրավիճակի առարկայական հսկողութիւնը»: 5 սեպտեմբերին Մինսքի
մէջ ստորագրուած` Ուքրանիոյ հարցով կապի խմբակի արձանագրութեան արդիւնքներով` Զախարչենքօ
եւ Փլոթնիցքի Ուքրանիոյ իրավիճակը կարգաւորելու հարցով ԵԱՀԿ-ի յատուկ ներկայացուցիչ Հայտի
Թալիավինիի փոխանցած են ձեռք բերուած համաձայնութիւններու իրականացման շուրջ առաջարկներ: Միւս
կողմէ, Ուքրանիոյ հարցով ԵԱՀԿ-ի ներկայացուցիչ Հայտի Թալիավինի յայտնեց. «Ուքրանիոյ մէջ
կացութեան լուծման շուրջ Մինսքի արձանագրութեան ստորագրութիւնը այդ երկրին մէջ քաղաքական
երկխօսութեան սկսելու առիթ կը ստեղծէ»: Զուիցերիական «Լը Մաթան» օրաթերթին հետ հարցազրոյցի
մը ընթացքին ան նշեց, որ քաղաքական երկխօսութեան սկսելու առիթ մը գոյութիւն ունի` աւելցնելով,
որ Մինսքի համաձայնութիւնը կը բովանդակէ Ռուսիոյ նախագահ Վլատիմիր Փութինի ներկայացուցած
խաղաղութեան ծրագիրէն եւ Ուքրանիոյ նախագահ Փիոթըր Փորոշենքոյի ծրագիրէն կէտեր: